З 26 студзеня 2024 года беларусы больш не змогуць атрымаць польскія візы Poland. Business Harbour (PBH), паведамляе dev.by. Гэтую інфармацыю журналісту «Люстэрка», які патэлефанаваў як звычайны грамадзянін, пацвердзілі ў консульстве Польшчы ў Мінску. Даведаліся, ці выдадуць іх беларусам, якія раней паспелі падаць заявы на атрыманне такіх візаў.
— На жаль, гэта праўда, — сказаў супрацоўнік сакратарыята консульства. — З сённяшняга дня гэтыя візы больш не выдаюцца. Пра прычыны такога рашэння сказаць нічога не магу — на жаль, пан консул нам гэтага не разгалошваў. Проста праінфармаваў, што больш яны з сённяшняга дня не выдаюцца, візавыя цэнтры пра гэта праінфармаваныя. Пакуль што падрабязнейшай інфармацыі мы вам даць не ў стане.
Ці змогуць атрымаць візы Poland. Business Harbour тыя беларусы, што раней паспелі падаць заявы на іх выдачу?
— Усе заявы, якія на момант 24 студзеня 2024 года трапілі ў консульства, будуць разгледжаныя згодна з акрэсленым парадкам, — адказаў супрацоўнік.
Нагадаем, у першым паўгоддзі 2023 года па праграме PBH у Польшчу заехалі 1243 замежнікі, а ў другой палове мінулага года — 1185. Усяго ж з пачатку дзеяння праграмы ў краіну рэлакавалася 13,5 тысячы чалавек з візамі PBH. Пры гэтым агульная колькасць такіх візаў, выдадзеных замежнікам, склала каля 100 тысяч.
Эксперты заяўлялі, што праграма Poland. Business Harbour сама па сабе мае «сур'ёзныя недахопы». Паводле іх, выдадзеныя па ёй візы даюць замежнікам магчымасць легальна трапіць у Шэнгенскую зону, але не дапамагаюць польскім кампаніям прыцягваць IT-спецыялістаў, як задумвалася першапачаткова.
Праграма Poland. Business Harbour першапачаткова была створаная ў 2020 годзе для грамадзян Беларусі — айцішнікаў і іх сем’яў, якім давала шэраг ільгот. Праз год яе дзеянне пашырылі на грамадзян Украіны, Грузіі, Малдовы, Арменіі, Расіі і іншых краін — усяго іх 44. Аднак пераважная большасць уладальнікаў IT-візаў — усё роўна беларусы: паводле ацэнкі польскіх палітыкаў, такіх каля 65 тысяч чалавек.
Чытайце таксама
