Памежная служба Польшчы прызнала больш пільны дагляд падарожнікаў на мяжы з Беларуссю і патлумачыла гэта «пагрозамі нелегальнай міграцыі», праз якія афіцэраў з пункта ў Тэрэспалі перакідваюць на стрымліванне мігрантаў у лясах. Пра гэта польскае ведамства паведаміла «Белсату».
«У сувязі з недастатковай абаронай дзяржаўнай мяжы з беларускага боку мы былі вымушаныя арганізаваць больш дэталёвы кантроль асобаў, якія заязджаюць у Польшчу, — да таго часу, пакуль не знікне рэальная пагроза нелегальнай міграцыі», — паведаміў прэс-сакратар Надбужанскага аддзела Памежнай службы Польшчы, які кіруе пунктам пропуску ў Тэрэспалі, Дарыюш Сяніцкі.
Пры гэтым Сяніцкі адзначыў, што на пункце пропуску «Тэрэспаль» аўтобусы правяраюцца ў прыярытэтным парадку.
Тэлеканал даслаў запыт у Памежную службу Польшчы 3 красавіка, калі ў Брэсце ўтварылася чарга з 370 легкавікоў і 38 аўтобусаў. У чатах, дзе падарожнікі абмяркоўваюць праходжанне мяжы, абражалі польскіх чыноўнікаў, наракаючы, што тыя павольна працуюць і не адкрываюць усе каналы на тэрмінале. Тады таксама з’явілася неафіцыйная інфармацыя, што на польскім баку афіцэры не асабліва спяшаюцца і занадта пільна ўсіх і ўсё правяраюць таму, што памежнікі злавілі мігранта, які трапіў на тэрыторыю суседняй краіны з Беларусі.
Паводле інфармацыі Дзяржпамежкамітэта Беларусі на момант публікацыі, у чарзе на выезд у Польшчу стаіць больш за 250 аўтамабіляў і некалькі дзясяткаў аўтобусаў.