Грамадзянін Польшчы Ірэнэуш падарожнічае па Беларусі і дзеліцца ўражаннямі ў TikTok. У сваіх першых роліках ён расказваў (імаверна, жартам), як разлічваў знайсці тут заробак 3000 еўра, але нічога не атрымалася. Таксама паляк дзівіцца звычаю беларусаў хадзіць па абменніках і параўноўвае стравы дзвюх краін. Нядаўна мужчына зняў відэа пра тое, ад чаго ён «шалее» ў Беларусі — аказалася, гэта звычка ездзіць па крайняй левай паласе, якая, на яго думку, прызначаная для абгону.
@polak_by1 ♬ dźwięk oryginalny — Поляк в Беларуси
— Чаму па левай паласе, якая толькі для абгону, вы проста ездзіце? Як нязручна! — паскардзіўся Ірэнэуш.
На яго думку, такі стыль язды перашкаджае іншым кіроўцам, якім для абгоннага манеўру часам даводзіцца віхляць «па ўсіх палосах».
У якасці доказу сваіх словаў падарожнік запісаў ролік на адной з беларускіх трасаў, дзе сам ён едзе ў сярэдняй паласе, а яшчэ два аўтамабілі — у крайняй левай. У нейкі момант задні легкавік абганяе пярэдні справа па сярэдняй паласе і зноў едзе ў левай, цяпер ужо наперадзе.
— Я не разумею: у Еўропе, напрыклад, у Польшчы, абагнаў — адразу з’ехаў на правую паласу. А тут — левая паласа, і ўсе едуць, — адзначыў паляк.
Паводле п. 79 раздзела 10 ПДР, падчас руху перамяшчацца на іншую паласу можна толькі перад абгонам, апярэджаннем, аб’ездам перашкоды, паваротам налева ці направа, разваротам ці прыпынкам. Пры гэтым:
- па-за населенымі пунктамі забараняецца займаць левыя палосы руху пры свабодных правых;
- пры трох і больш палосах руху ў гэтым напрамку займаць крайнюю левую паласу руху дазваляецца толькі тады, калі занятыя іншыя палосы руху, альбо для апярэджання, аб’езду перашкоды, павароту налева ці развароту, а таксама для прыпынку, стаянкі на левым баку дарогі з аднабаковым рухам у пэўных выпадках;
- пры трох і больш палосах руху ў гэтым напрамку забараняецца перамяшчацца на крайнюю правую паласу руху з мэтай апярэджання па ёй.
У каментарах многія згаджаліся з палякам:
- «Цалкам згодная. Таксама не разумею, навошта ездзіць па левай паласе? Яшчэ ледзь-ледзь едуць».
- «Так, пасля язды ў Еўропе гэта напружвае, а яшчэ апярэджанне справа».
Такую з’яву часта тлумачылі тым, што «правая паласа звычайна ўся ў выбоінах і каляінах ад велікагрузаў, таму едуць па левай».
Некаторыя нагадалі, што ў межах населеных пунктаў правілы дазваляюць ездзіць і па левай паласе, а сёй-той заявіў, што «мая тачка, як хачу, так і езджу».
Ёсць і тыя, хто сцвярджае, што на Захадзе таксама часта парушаюць ПДР:
- «10 гадоў езджу па Польшчы, тое самае».
- «Сустракаў такое і ў Літве, і Польшчы. Але вось у Германіі гэта так, там народ прывучаны перамяшчацца направа. А ў чым прыкол „ташніць“ у левым шэрагу, асабіста я не разумею».