У гадавіну поўнамаштабнага расійскага ўварвання ва Украіну 24 лютага ЗША пашырылі санкцыі супраць Расіі.
Мінфін ЗША ўнёс у чорны спіс прозвішчы 22 чалавек і назвы 83 кампаній з Расіі і шэрагу іншых краін. Пад санкцыі трапілі прадпрыемствы абаронна-прамысловага комплексу, авіякасмічнай галіны і сектара электронікі.
Акрамя таго, пад санкцыі трапілі расійскія банкі: Маскоўскі крэдытны банк, Банк «Санкт-Пецярбург», Банк «Зеніт», Ланта Банк, Банк «Урасіб», МТС Банк, Металінвестбанк, Банк «Прымор'е», СДМ-Банк, Уральскі банк рэканструкцыі і развіцця, Банк «Левабярэжны».
Санкцыі прадугледжваюць абмежаванні на правядзенне некаторых аперацый з гэтымі фінансавымі ўстановамі. Мінфін ЗША таксама апублікаваў генеральную ліцэнзію, якая дазваляе аперацыі з гэтымі банкамі да 25 траўня 2023 года, каб завяршыць цяпераўшнія ўгоды.
У рамках санкцый ЗША таксама з 10 сакавіка ўвядуць 200% пошліну на імпарт алюмінію і алюмініевых прадуктаў з Расіі.
Акрамя таго, быў пашыраны чорны спіс Мінгандлю ЗША: у яго трапілі 76 новых юрасоб. Сярод іх фонд «Сколкава», Сколкаўскі інстытут навукі і тэхналогій («Скалтэх»), Інстытут прыкладной матэматыкі ім. Келдыша, Навукова-даследчы інстытут сістэмных даследаванняў РАН. У чорны спіс яны трапілі «на аснове інфармацыі, якая сведчыць пра тое, што яны аказваюць істотную падтрымку УС РФ і/або кампаніям у расійскім ВПК».
Таксама Мінгандлю пашырыў пералік тавараў, якія адносяцца да прадметаў раскошы, у дачыненні да Расіі і Беларусі: у яго ўвайшлі яшчэ 276 найменняў.
«Міністэрства гандлю пашырае і робіць больш жорсткімі цяпераўнія санкцыі супраць Расіі і Беларусі, уключаючы сферу дзеяння правілаў экспартнага кантролю за расійскім і беларускім сектарамі прамысловасці, і санкцыі ў дачыненні да прадметаў раскошы», — адзначаецца ў заяве Мінгандлю ЗША.
Акрамя таго, Мінгандаль ЗША «удасканаліць наяўныя меры экспартнага кантролю ў дачыненні да Расіі і Беларусі», каб «павысіць эфектыўнасць свайго кантролю» і «лепш сумясціць іх з тымі [мерамі], якія ўвялі саюзнікі і партнёры ЗША».
Новыя абмежаванні ўвёў і Дзяржаўны дэпартамент ЗША. У санкцыйны спіс уключылі кіраўнікоў дзясяткаў рэгіёнаў РФ, дзевяць міністраў, а таксама віцэ-прэм'ера Таццяну Голікаву. У дачыненні да 1219 расійскіх вайскоўцаў уведзеныя візавыя абмежаванні.