Кіраўнік партыі «У імя Рэспублікі» Арман Бабаджанян разам з паплечнікамі закідаў яйкамі, памідорамі і бульбай амбасаду Беларусі ў Арменіі, піша Panorama.am. Нагодай сталі выказванні Аляксандра Лукашэнкі пра Арменію ў інтэрв'ю расійскаму дзяржтэлеканалу.
Кіраўнік партыі «У імя Рэспублікі», якая выступае за збліжэнне краіны з Захадам, Арман Бабаджанян 20 жніўня ў Facebook напісаў, што пасля непаважлівых заяваў Лукашэнкі на адрас Арменіі МЗС краіны мусіць неадкладна запрасіць амбасадара Беларусі, «падаць скаргу на неабгрунтаваныя выказванні і прапанаваць вярнуцца ў Мінск для правядзення дадатковых кансультацый».
«Ды каму армяне патрэбныя, акрамя нас? Нікому не патрэбныя. <…> Якая Францыя, які [прэзідэнт Францыі Эманюэль] Макрон? Заўтра Макрона не будзе, і ўсе забудуць пра гэтую Арменію», — заявіў Лукашэнка ў інтэрв'ю каналу «Россия» 19 жніўня. Відаць, палітык спасылаўся на падтрымку, якую Парыж аказаў Ерэвану ў разгар канфлікту з Баку. Гэтыя словы не засталіся без увагі ў Арменіі. У прыватнасці, кіраўнік армянскай парламенцкай фракцыі «Честь имею» Айк Маміджанян заявіў, што «нікому, уключаючы Аляксандра Лукашэнку, хай не падасца, што з Рэспублікай Арменія можна гаварыць так, як асабіста з Ніколам Пашынянам».
Аднак рэакцыя армянскага МЗС адсутнічала, і Бабаджанян прапанаваў прадстаўнікам дэмакратычных сіл сустрэцца ля амбасады Беларусі ў сераду і «перадаць калектыўнае стаўленне нашага народа» да Аляксандра Лукашэнкі.
У выніку 21 жніўня каля беларускага дыппрадстаўніцтва сабралася некалькі чалавек на чале з Бабаджанянам, якія закідалі будынак яйкамі, памідорамі і бульбай. Пратэстанты дэкламавалі «Прэч з Арменіі!». Трансляцыю з месца падзей вёў тэлеканал 1in.
Пасля акцыі палітык апублікаваў заяву, падпісаную партыямі «Рэспубліка», «За рэспубліку», «Еўрапейскай партыяй Арменіі», арганізацыяй «Европа права» і клубам журналістаў «Аспарэз». У заяве гаворыцца, што «кансультацыйная платформа дэмакратычных сіл Арменіі патрабуе ад уладаў Рэспублікі Арменія разарваць дыпламатычныя адносіны з Беларуссю».
Адзначаецца, што словы «армяне нікому не патрэбныя» — чарговая дэманстрацыя Лукашэнкам ягонай «антыармянскай пазіцыі, якая стала для яго кепскай традыцыяй». Крытыкуецца падтрымка, аказаная «Беларуссю Азербайджану ў вайне супраць Арменіі і армянства, у чым нядаўна прызнаўся беларускі дыктатар», падкрэсліваецца «сістэматычнае і парушэнне правоў уласнага народа і грамадзян з боку беларускага дыктатарскага рэжыму».
Акрамя разрыву дыпадносін і абвяшчэння супрацоўнікаў амбасады персонамі нон грата прапануецца разарваць усе двухбаковыя дамовы з Беларуссю, уключаючы пагадненне пра бязвізавыя паездкі грамадзян, а таксама «лічыць немагчымым знаходжанне ў адным вацсковым саюзе і адной эканамічнай і мытнай прасторах з Беларуссю і неадкладна выйсці з АДКБ, ЕАЭС і СНД».