Міністэрства абароны Расіі распрацавала папраўкі да палажэння пра вайскова-медыцынскую экспертызу, якія пашыраюць кола захворванняў, што не будуць перашкодай для службы ў войску. Згодна з дакументам, апублікаваным на партале праектаў прававых актаў, вайсковыя медкамісіі могуць прызнаваць прыдатнымі да службы грамадзян з псіхічнымі разладамі, гіпертаніяй, сіфілісам і шэрагам іншых захворванняў. Увагу на гэта звярнуў тэлеграм-канал «Осторожно, новости».
У тлумачальнай запісцы гаворыцца, што змены звязаныя з «досведам масавага агляду вайскоўцаў у перыяд правядзення спецыяльнай ваеннай аперацыі» і закліканыя «прывесці дыягнастычныя крытэры да сучасных падыходаў».
Сярод ключавых змен:
- Сіфіліс. Прызыўнікі з першасным, другасным і схаваным сіфілісам могуць атрымаць катэгорыю «Б-4» (прыдатны з нязначнымі абмежаваннямі) замест «В» (абмежавана прыдатны), якая дзейнічае цяпер.
- Гіпертанія. Маладыя людзі з гіпертаніяй першай стадыі больш не будуць вызваляцца ад службы — замест катэгорыі «В» ім плануецца прысвойваць «Б-3» (прыдатны з абмежаваннямі).
- Псіхозы і неўрозы. Кантрактнікі і мабілізаваныя з умеранымі эндагеннымі псіхозамі (уключаючы шызафрэнію, афектыўныя разлады і разлады трызнення) і рэзка выяўленымі неўратычнымі разладамі будуць праходзіць па катэгорыі «В» замест «Д» (не прыдатны).
- Скурныя захворванні. Паражэнні скуры, такія як псарыяз, экзэма і нейрадэрміт, будуць лічыцца распаўсюджанымі толькі пры паражэнні больш за 10% паверхні цела.
- Хранічная крапіўніца. Дыягназ будзе грунтавацца на неэфектыўнасці лячэння цягам чатырох тыдняў і частаце рэцыдываў (не радзей за два разы на тыдзень).
Акрамя таго, прапануецца магчымасць завочнага агляду вайскоўцаў і прызыўнікоў па дакументах, калі не патрабуецца дадатковага медыцынскага абследавання.
Дакумент ахоплівае шырокае кола катэгорый — ад прызыўнікоў і кантрактнікаў да мабілізаваных, добраахвотнікаў і абітурыентаў вайсковых навучальных установаў. Папраўкі яшчэ не ўступілі ў сілу і пакуль знаходзяцца на стадыі абмеркавання.